share this article

جورج آر آر مارتن -اللي كتب مسلسل Game of Thrones- في واحدة من أقواله بيقول إن اللي بيقرأ كتاب بيعيش ألف حياة، لكن اللي مش بيقرأ بيعيش حياة واحدة بس، ده لأننا كبني آدمين عندنا قدرة خارقة اسمها الخيال، ومش بتكلفنا حاجة غير إننا نمدها بقصص وصور وهي هتطلعهم وقت اللزوم وتنقلنا لعالم تاني، كل ده وانت قاعد في نفس المكان، وإن كنا مش قادرين نسافر ف خيالنا هيقوم بالمهمة دي؛ ومش محتاج تمشي في إجراءات أكتر من إنك تجيب الكتاب وتقعد في مكان مريح وتبدأ الرحلة، ممكن تضيف مشروب دافي مفضل لتهيئة الأجواء وتظبط الإضاءة والمزيكا.

1- "تخليص الإبريز في تلخيص باريز" - رفاعة الطهطاوي

ليه ده أول كتاب حبينا نبتدي بيه؟ عشان الكتاب ده أكبر بكتير من النكت والميمز اللي اتعملت وقعدنا نضحك عليها، ده كتاب مش بياخدك رحلة للمكان بس؛ ده بياخدك رحلة لزمن وحكاوي رفاعة الطهطاوي، واللي طلع مع البعثة الطلابية المصرية لباريس، وقعد الراجل 5 سنين يكتب ويدوّن ويترجم موسوعة من أول وصفه للرحلة والطريق من القاهرة لباريس؛ لحد كل تفاصيل أحوال العلوم والتاريخ والجغرافيا والسياسة والحياة الإجتماعية في مصر وفرنسا في الوقت ده .. هتدخل في آلة الزمن وتخرج في زمان ومكان تانيين خالص. الكتاب إصدار دار المعارف، وتقدر تحمّل نسخة PDF من الكتاب من اللينك ده.

2- "أوروبا بتوقيت امبابة" - محمود زكي

جينا للعصر الحديث، أدب رحلات ساخر في كتاب "أوروبا بتوقيت امبابة"، اللي محمود زكي هيحكيلك فيه عن الحمام العمومي الديجيتال في شوارع باريس، والإشارة الإلكترونية في تكساس، الآيس كريم بالبانجو في أمستردام وشوربة صفار البيض في سويسرا، الشوارع والبيوت والمواقف اللي هتحس إن كإنك عشتها بنفسك. الكتاب نشرته دار أطلس سنة 2016، وممكن تقرأه أونلاين من لينك Goodreads أو لو حابب تشتريه هتلاقيه في مكتبة الشروق.

3- "هوستيل" - شيرين عادل

الكاتبة الوحيدة في الليستة بتاعتنا؛ شيرين عادل، بس "هوستيل" مش هو كتابها الوحيد؛ هو آخر كتاب أصدرته لحد دلوقتي عن قصص وحكاوي الهوستيل والناس والمواقف اللي بتقابلها فيه، لكن شيرين عندها مجموعة كتب في أدب الرحلات أولهم كان "الأولة باريس" اللي بياخدك رحلة 14 يوم في شوارع باريس ودهاليزها يخليك تحس إنك رحت الرحلة دي معاها، أما كتابها التاني "الفيروزية" ف هتلف معاه 3 دول في الشام؛ لبنان وسوريا والأردن وأكتر من 25 مدينة مختلفة جواهم، ولو أخدتك الحماسة وقررت تستفيد من قعدتك في البيت وتبتدي تخطط لكل السفريات اللي نفسك فيها من زمان؛ يبقى عليك وعلى كتاب "أساطير السفر السبعة"، 7 فصول كل فصل منهم بيتكلم عن أسطورة: التخطيط، التأشيرة، الإقامة، المواصلات، اللغة، الأكل والسلامة، كل حاجة هتحتاج تعرفها عشان تبتدي تخطط رحلة مظبوط وبأقل تكلفة. الكتب كلها موجودة أونلاين على Goodreads، أو لو حابب تشتريهم هتلاقيهم في مكتبة الشروق أو نهضة مصر.

4- "أكتب إليك من بلد بعيد" – علاء خالد

"في اليونان؛ الأرض هي البحر، في المغرب؛ الصباح هناك له جاذبية، في مارسيليا؛ هناك دائماً وقت لعمل شيء ما، في أمريكا أشعر بأني قريب من كل شيء حولي، لكنها جنة اصطناعية" .. الكاتب علاء خالد بياخدنا في تفاصيل مدن مختلفة، من خلال تعاملاته مع الناس وحواراته اليومية ومراقبته ليهم في كل مكان، وكمان بيشرح لتفاصيل الأماكن والأزمنة اللي بيكون متواجد فيها في المدينة دي، ونعكاس كل التفاصيل دي عليه في حوارات بينه وبين نفسه، فالكتاب ده مش رحلة واحدة لكن الكاتب بيتنقل بين مدن وبلاد وقارات. الكتاب من نشر دار الشروق سنة 2016.

5- "مسافر الكنبة في إيران" -  عمرو بدوي

إيران مش من الدول اللي سهل أي حد يدخلها ويروحها، ومن أكتر الدول الموصومة هي وشعبها بأفكار نمطية ومغلوطة، بس في الكتاب ده الكاتب عمرو بدوي بيلف 20 يوم في البلد ويعرفك عليه وعلى شعبه من خلال المواقف والحكايات، كل ده وهو بيستكشف كمان عالم الـcouchsurfing؛ واللي هو لوحده عالم مليان حكايات وتجارب مش بتخلص في أي حتة؛ تخيل لما يكون من إيران كمان، يعني هتدخل الزخانيق مش هتعدّي من على الوش. هتلاقي الكتاب عند دار الشروق، وهو أصلاً من نشر دار مقام سنة 2015.

6- "رحلة إكسبريس من إسكندرية وإستامبول: مع المستر أتول" – توفيق حبيب

واضح إنها رحلة لتركيا، وكلنا شوفناها في المسلسلات، بس المختلف إن الكتاب ده بيحكي عنها ويقارنها بالقاهرة اللي بتكسب، الكتاب كان في الأصل مجموعة مقالات نشرت في الأهران في التلاتينيات، فكمان رحلة في الزمن، المهم وقتها السفر كان صعب وغالي ومش حاجة عاديا يعني بس الكاتب لاقى قدامه فرصة ومضيعهاش ورجع ينقل رحلته هو وزملائه للقرأ، وهتلاقي الكتاب هنا.

7- "حول العالم في 200 يوم" – أنيس منصور

أصل مش هينفع ليستة زي دي مايبقاش فيها أنيس منصور؛ دي حتى الناس تاكل وشنا، في الكتاب ده هتلف حوالين العالم مع كاتب وصحفي وتشوف الدنيا من وجهة النظر دي، وطبعاً الكتاب جواه إنجازات كتير؛ زي إنه أول صحفي عمل مقابلة مع الدلاي لاما، وكمان اتصور معاه، بس لو إنت مش عارف مين الدلاي لاما فممكن تعرف من هنا. الكتاب ده نشرته دار القلم سنة 1963 وكان وقتها بـ60 قرش، ودار القلم دي بقت دار الشروق اللي بتنشره دلوقتي، وهتلاقي الـPDF هنا، أو لو عايز تشتري الكتاب نفسه فهتلاقيه في مكتبات الشروق.

8- "جولة في ربوع أستراليا" – محمد ثابت 

كتاب هياخدك مش بس أستراليا؛ لكن الكاتب في رحلة 110 يوم بيقف في طريقه في أوروبا  وآسيا وأفريقيا وبيخلص رحلته في أمريكا الشمالية، المدهش في الكتاب ده إن أحداثه بتدور سنة 1936 يعني حاجة مختلفة تماماً عن اللي إحنا فيه دلوقتي، الكاتب محمد ثابت كان متعود إنه كل صيف يروح يستكشف مكان جديد، فهتلاقي عنده سلسلة بعنوان جولة في ربوع (....) وعلى حسب بقى الربوع دي فين، أفريقيا، أوروبا، أمريكا، آسيا، وطبعاً أستراليا.

9- "جنوباً وشرقاً" - محمد المخزنجي

كتاب بطابع مختلف جمع فيه الأديب والصحفي محمد المخزنجي حالة الولع اللي كانت عنده بدول الجنوب ودول الشرق، مجموعة من الرحلات الاستطلاعية الصحفية اللي عملها -واللي كانت في وقتها طفرة في عالم الصحافة- قدر من خلال الرحلات جي إنه يراقب أحوال الناس وإزاي عوامل التاريخ والجغرافيا والثقافة والطبيعة في كل ناحية بتفرق في تشكيل الناس، بنشوف في الكتاب تحديات في مقاومة العنصرية في جنوب أفريقيا، وآثار الحرب في البوسنة، عشان نوصل في الآخر لرؤيته الروحية والفلسفية بعد كل الاستطلاعات والمراقبة اللي عملها في رحلاته. الكتاب موجود أونلاين على Goodreads أو لو عايز تشتري نسخة فهتلاقيه في مكتبات الشروق.

10- "تذكرتين سفر" - محمد حمودة

الكتاب ده هو تدوين لرحلة الكاتب محمد حمودة لروسيا وجورجيا، بياخدك لكنوز في بلاد الاتحاد السوفييتي السابق قبل ما يبقى مش اتحاد، بس كمان هو تجربة إنسانية فيها حكاوي عن البشر والأصحاب والمواقف اللي بيتعرضولها، سهل مع كل فقرة تقرأها إنك تاخد ملاحظات على جنب وتجمع معلومات تخليك قادر تكرر نفس رحلته بالظبط، مش هتحتاج حتى تدوّر على أسعار تذاكر المتاحف وتفاصيلها وتروحلها إزاي، الكتاب جايبلك كل التفاصيل دي. وتقدر تلاقيه أونلاين بكذا طريقة على موقع Goodreads.