share this article
لو اتولدت لقيت نفسك مصري والنيل جواك بيسري فأكيد هتعرف إن المصريين بيتكلموا عربي، لو مثقف شوية هتعرف إن مصر فيها مواطنين لغتهم اليومية مش العربية زي النوبيين مثلا، بس تعرف إن مصر فيها حوالي ٦ لغات أم لمجموعات سكانية مختلفة؟

1. اللغة النوبية

المصدر: Getty Image
الاعتقاد السائد إن من 2500 سنة ظهر أول متحدث للغة النوبية في جنوب مصر وشمال السودان، واللي كانت مجموعات ترحال على ضفاف النيل ولو ده حقيقي فده هيخلي اللغة النوبية من أقدم اللغات، خاصة كمان إن اللغة النوبية هي مجموعة لغات مش لغة واحدة بس.

ليه في اختلافات كبيرة بين اللغة العربية والنوبية؟
لو سمعت اتنين بيتكلموا اللغة النوبية الأصلية فإنت في الأغلب مش هتفهم أي حاجة، وده لإن النوبي من عائلة اللغات الـ Nilo-Saharan والعربي من اللغات السامية من الـ Afro-Simitic و ده بيخلي النوبي مشترك مع لغات شرق افريقيا أكتر من العربي.

اشهر لغات عائلة الـ Nilo-Saharan هي لغة الـ Luo والـ Kunari ودي لغات بيتكلمها حوالي 4 مليون شخص كل لغة في شرق أفريقيا.
8 كلمات نوبية هيخلوك نوبي أكتر من بكار

2. اللغة الدومرية
المصدر: علي زرعي

أكاد أجزم إن 99 في المائة من المصريين بما فيهم أنا قبل ما اعمل الـ research ده، كانوا يعرفوا إن اللغة دي موجودة أصلا، لكن اللغة دي من لغات الغجر في مصر، وأصلها هندي ومن عائلة الـ Indo-Aryan languages، من أشهر اللهجات الموجودة في مصر هي اللهجة النورية و الغازية "أيوة كلمة يا حوش يا نَوَّر مقصود بيها قبيلة النَوَّر في مصر" وبتتنطق "ناوار".

3. لغة البجا (الروطانا)
 
لغة شعب البجا الرحالة في مصر والسودان، وده الشعب اللي بيسكن ما بين ساحل البحر الأحمر ونهر النيل في السودان، ومنطقة مثلث حلايب.
مفيش معلومات كتير عن اللغة دي بس هي موجودة في مصر والسودان والبدو الرحالة في الصحراء الشرقية بيستخدموها، أصل اللغة زي العربي، بس فرعها Cushitic من الجنوب، شعب البجا في مصر يقدر عددهم بـ 77 ألف نسمة.

4. اللغة الأمازيغية السيوية️
 
لو عمرك زرت واحة سيوة ️ هتلاحظ إن أهل الواحة بيتكلموا لغة غريبة شوية، اللغة دي لغة أمازيغية، وبيتقال عليها اللغة السيوية البربري، وللأسف كلمة بربري اتقالت على متحدثي اللغات الأمازيغية القديمة في شمال أفريقيا، علشان اليونانيين زمان كانوا فاكرين أي حد مش بيتكلم يوناني بيقول bar bar bar يعني أي كلام، والاعتقاد ده اتنقل للرومان اللي قابلوا القرطاجيين "التوانسة" في معارك كتير، - ممكن تجوجل معارك حنبعل وقيصر" عشان كده اطلقوا عليهم بربر.

حوالي 15 لـ 20 ألف شخص في مصر دلوقتي بيتكلموا اللغة السيوي، لكن كلهم تقريبًا بيتكلموا عربي برضه، وطبعًا بلهجتهم الجميلة.

5. لغة الإشارة المصرية
المصدر: identity-mag
لو متعرفش المعلومة فأحب اقولك ان كل لغة في العالم عندها لغة اشارة مختلفة، يعني لو اتعلمت لغة الاشارة بالانجليزي فانت مش هتفهم معظم اشارات لغة الاشارة العربي أنا أسف علي قتل الطموح.
مصر عندها لغة إشارة مخصوص بالمصري، و بيستخدمها حوالي 2 مليون نسمة من الصم والبكم وضعاف السمع في مصر

6. اللغة القبطية


القبطية هي لغة قديمة من عائلة ال Afro-Asiatic وزمان كانت لغة أدبية رائعة ومنتشرة وغنية، اللغة دلوقتي مازالت موجودة، وبيتحدث بيها، لكن في حدود الشعائر الدينية المسيحية، برغم إنها قبل المسيحية أصلا.
اللغة دي اتكتب بيها من أيام المصريين القدماء يعني من حوالي 5 آلاف سنة، لكن طبعًا اتطورت عبر السنين، و دخلت منها كلمات جوه العربي الدارج بتاعنا.
يعني مثلا كلمات "بخ، بعبع، حنطور، زيطة، كِن" يعني اهدى بالفلاحي، كل دا كلام قبطي.


خلاص كده؟ لاء لسه عندك مجموعات قليلة في مصر بتتكلم فرنساوي ويوناني وإيطالي وعبري كلغة أم مش لغة تانية، ومواطنين مصريين عادي خالص.