share this article

الحاجة الغريبة في الإمارات إن الأجانب فيها أكتر من أهل البلد، فيها أكتر من 200 جنسية مختلفة! مع العدد الضخم ده من الثقافات والخلفيات المختلفة هتلاقي مزيج متناقض غريب وجميل من الجديد والقديم، هتلاقي محبي الموسيقى الشعبية والإلكترونية والروك وغيرهم، كل ده في نفس المكان. أيًا كان نوع الموسيقى اللي بتحبه، هتلاقي معجبين كتير حواليك وغالبًا كمان هتلاقي حفلة أو مهرجان بيحتفلوا بالنوع ده في مكان ومعاد قريبين منك.

DUBAI JAZZ FEST

ده واحد من أقدم المهرجانات في الإمارات –ابتدي في 2003- وبيتعمل في مدينة دبي للإعلام. المهرجان ده بيجمع محبي الموسيقى من أنحاء العالم وبيشيل أعداد توصل إلى 60 ألف شخص وبيقعد 3 أيام. المهرجان بيتقدم فيه أنواع موسيقى غير الجاز وبيتعمل في فبراير من كل سنة وبيستضيف فنانين عالميين زي Sting وJohn Legend اللي حضروا قبل كده.

RedfestDXB

المهرجان السنوي ده ابتدى سنة 2013 وبيتعمل في مسرح مدينة دبي للإعلام في شهر فبراير. بييجي كل سنة مجموعة من الفنانين المشهورين زي The Chainsmokers وِAdam Lambert  وCraig David اللي حضروا قبل كده. المهرجان ده واحد من أكبر المهرجانات في دبي وبيتعمل برعاية شركات كبيرة زي Virgin.

DESTINATION DAWN

ده بيتعمل في رأس الخيمة على جزيرة المرجان، ويعتبر أول مهرجان في المنطقة يقعد طول الليل -لمدة 12 ساعة- على شاطيء. الحفلة دي بتتعمل مرتين في السنة في شهر مختلف كل سنة وبيحضر DJs معروفين عالميًا وعدد من الفنانين المحليين كمان. أول حفلة في 2018 اتعملت في أبريل.

YASALAM FESTIVAL

أول مهرجان ياسلام اتعمل سنة 2009، من ساعتها المهرجان ده تفاعل معاه أكتر من 2 مليون شخص ويعتبر واحد من أكتر الحفلات اللي الناس بتستناها في المنطقة وحضره فنانين عالميين قبل كده زي  Lionel Richie و Pitbull. المهرجان بيقعد 11 يوم وبيحتفلوا فيه بالموتوسيكلات والموسيقى وبيتعمل في أبو ظبي في نوفمبر.

UNITE WITH TOMORROWLAND

السنة اللي فاتت كانت أول سنة الحفلة دي تتعمل وحصلت في دبي. أي حد بيحب الموسيقى الإلكترونية في العالم عارف  Tomorrowland اللي هو أكبر مهرجان موسيقى إلكترونية في العالم، بس مش كل الناس غنية وتقدر تحضر في بلد المهرجان الأصلية –بلجيكا. علشان كده اتعمل حفلة فيها المهرجان الأصلي بيتذاع مباشر لكذا دولة في العالم. السنة دي هيتذاع في أبو ظبي وهيبقى فيه عدد من الفنانين المحليين والعالميين كمان على المسرح هناك، غير البث المباشر من بلجيكا. الحفلة دي بتدي فرصة لمحبي الموسيقى في أنحاء العالم إنهم يتجمعوا في حفلة عالمية تعدي الحدود بين البلاد وبتتعمل في نفس معاد المهرجان في بلجيكا في يوليو، مع فرق الإمكانيات.

WASLA MUSIC FESTIVAL

المهرجان ده بقاله سنتين وبقى واحد من أكبر المهرجانات في الإمارات. المهرجان ده بيركز على الموسيقى العربية البديلة وبيستضيف عدد من الفنانين المتنوعين كل سنة، زي فرق كايروكي ومجاز وأتوتستراد وبقية الفرق اللي على أسامي شوارع وأشكال هندسية من مربعات ومثلثات. المهرجان ده بيتعمل في فبراير في دبي.

SHARJAH WORLD MUSIC FESTIVAL 

المهرجان ده بيتعمل في الشارقة وبيحضره فنانين عرب وأجانب من بلاد كتير، وبيقدموا أنواع مختلفة من المزيكا زي البوب والموسيقى العربية التقليدية والجاز وغيرهم. المهرجان ده بيتعمل في يناير وبيهدف للترويج للسياحة.