share this article

 محافظة القاهرة عاملة مسابقة للأفلام القصيرة والتسجيلية  بإسم "القاهرة بعيون ولادها" بهدف توثيق كل المشروعات والإنجازات المعاصرة في القاهرة. المسابقة معمولة بمناسبة إن مصر هتستضيف بطولة الأمم الأفريقية. الأفلام لازم تحكي عن حاجة تخص تراث القاهرة وتظهر ايجابياتها والصور الحضارية  اللي فيها. اخر ميعاد لتسليم الفيلم يوم 15 مايو 2019
شروط المسابقة:
- الفيلم ميكونش أكتر من 10 دقايق ومش أقل من 3 دقايق
- يكون متصور بجودة عالية HD وكاميرات Full HD /4K
- يكون فيه موسيقى تصويرية لها ملكية عامة أو في اثبات على حق استخدامها في الفيلم
- الصور تكون أصلية ومسبقش استخدامها أو متكونش منشورة على الإنترنت
- الصوت يكون نقي من غير أي دوشة في الخلفية
- ممكن يكون الفيلم مشروع فردي أو جماعي
- الفيلم ميكونش شارك في أي مسابقات قبل كده ولا جوه ولا بره مصر
- حقوق الملكية لازم تروح كاملة لمحافظة القاهرة
بعدين بتروح تسلم المشروع في مقر المحافظة في إدراة الحفاظ على تراث القاهرة. وبتكون فيه لجنة بتبدأ  تتفرج على الأفلام وبيقيموها على حسب فكرة الفيلم وتأثيرها الإجتماعي والتوعوي وتنمية المهارات التحليلية عند الشباب.
  الجوايز
- المركز الأول جايزته 20000 جنيه
- المركز التاني 15000 جنيه
- المركز التالت 10000 جنيه
- من أول المركز الرابع للعاشر هيستلموا شهادات تقديرية.

المصدر: الوطن