share this article

أواخر أيام رمضان بتقرب، وهتلاقي نفسك بتخش في نفس الموال بتاع كل سنة، هتقضي ليلة الوقفة على أنهي قهوة وهتصلي صلاة العيد جنب بيت أنهي واحد في الشلة. لو إنت متهور وقررت تغامر، ممكن تكون مظبط سفرية بره القاهرة للساحل أو السخنة، أو حتى دهب، طبعًا بتبقى عامل حسابك إن الوضع هيبقى عامل زي سوق الجمعة في أي حتة تسافرها، بس الواحد بيضحي كتير عشان يشوف بحر. السؤال هنا، ليه متغامرش أكتر شوية وتروح تشوف البحر بره بلدك؟ طبعًا هتلاقي مليون مبرر إنك تكسل وتقضيها في القاهرة زي كل سنة، بس الوضع فعلًا مش لازم يبقى كده. باسبورك في إيدك، شوية الفلوس اللي هتصرفهم على الأيفون الجديد ممكن تسافر بنصهم بره مصر، ولو على قد المعلومات عن الفيزا وهتعمل إيه هناك، كله مكتوب تحت. يتبقى القرار إنك تسافر، بس متفكرش كتير عشان الأسعار دي لدلوقتي وممكن تتغير كمان كام يوم. السؤال يبقى، هتقضي الوقفة على القهوة بتتخانق مين فتح إزازة المياه المعدنية، ولا في وسط كاتدرائيات ميلانو أو معابد أثينا؟

بيروت، لبنانالمصدر: EAT
ممكن تلاقي أوصاف كتيرة توصف بيها بيروت، بس في الأول والأخر "جميلة" هو أدق وصف، مكان هتتبسط لما تزوره في أي وقت في السنة، وشعب رايق بيحب السهر والاحتفال. أيًا كان رحت هناك امتى، هتلاقي ثوابت معينة: أكل حلو جدًا، مزيكا لايف بالليل في كذا مكان، بارات فاتحة لحد الصبح، وتاريخ كبير وغني بشكل مخيف، يقدر يسحلك معاه أيام. بيروت مش مدينة تقدر تزورها مرة واحدة وتقول شفت كل حاجة.

الفيزا
ممكن تاخد فيزا بيروت من المطار لو معاك ألفين دولار، وتقدر تاخدها برضه من السفارة في القاهرة قبل ما تسافر، وفي الحالة دي مش هتحتاج الألفين دولار.

تكاليف الرحلة
متوسط الطيران في فترة أسبوع العيد: 3,800 – 4,000 جنيه مصري

متوسط إقامة شخصين ليلة في فندق: 450 – 800 جنيه

متوسط سعر تأجير شقة في الليلة: 650 – 2,000 جنيه

متوسط تكاليف الأكل في اليوم الواحد: 140 – 170 جنيه

أعمل إيه هناك؟

بيروت فيها مليون حاجة تتعمل، بس بما إن إنت مسافر وقت العيد، ممكن تبتدي أول يوم ليك بإنك تروح تحضر سهرة موسيقية في مكان فيه مزيكا لايف، وتستمتع بوجبات محلية وكوكتيلات وإنت بتسمع مزيكا من كذا لون. لو مش حابب المزيكا، ممكن تروح تسهر في أي بار أو نادي ليلي من اللي موجودين في كل كل حته هناك.

المصدر: Culture Trip
بعيدًا عن السهر والرقص والمزيكا، بيروت فيها معالم فنية وثقافية ممكن يشغلوا رحلتك جدًا لو بتحب ده، ممكن تبتدي بمتاحف بيروت اللي لازم تزورها، اللي بتغطي مواضيع مختلفة من الحرب الأهلية للعصور ما قبل التاريخ.

ناس كتير فاكرة بيروت غالية وهتحتاج تصرف فلوس كتير فيها، الكلام ده مش دقيق. في حاجات كتير ممكن تعملها في بيروت من غير ما تضطر تبيع كليتك، وهتنبسط جدًا وتقضي وقت لطيف وإنت بتعمل أي حاجة من دول، بأقل التكاليف أو ببلاش أصلًا.

رحلات صدة ردة من بيروت
لو حابب تعمل رحلة صدة ردة من بيروت، هتلاقي أماكن كتير ممكن تروحها وتجارب مختلفة ممكن تعيشها، زي إنك تروح بعلبك، اللي فيها شوية من أجمل وأشهر المعابد الرومانية في العالم، وكتير منها لسه حالته كويسة جدًا. هتلاقي كمان مغارة جعيتا، اللي عبارة عن مجموعة كهوف تحت الأرض منظرها وهمي، بيجيلها آلاف الزوار أسبوعيًا. في متنزهات ومدن ألعاب ممكن تقضي فيها يوم جميل مع العائلة زي Swings و Rio Lento.

عايز تطلع بيروت ومكسل تظبط رحلتك؟ ممكن تطلع مع Blue Sky Travel اللي هيظبطوا كل حاجة بالنيابة عنك.

أثينا، اليونانالمصدر: Avis

الفيزا

أثينا هتحتاج منك فيزا شنجن، ودي تقدر تقدملها في سفارة اليونان في مصر. يستحسن تقدم على الفيزا الشنجن من البلد اللي ناوي تسافرلها علطول، مع إن الفيزا لو خدتها هتدخلك من أي دولة شنجن، بس الدنيا هتبقى أسهل لو مسافر اليونان وخدتها من سفارتهم.

تكاليف الرحلة

متوسط الطيران في فترة أسبوع العيد: 4,800 – 5,000 جنيه مصري

متوسط إقامة شخصين ليلة في فندق: 470 – 1000 جنيه

متوسط إقامة شخص في هوستيل في الليلة: 200 – 1,100 جنيه

متوسط تكاليف الأكل في اليوم الواحد: 120 – 200 جنيه

أعمل إيه هناك؟

إنك تبقى في أثينا ده معناه إنك في مهد حضارات وثقافات كانت بتحكم العالم في وقت من الأوقات، مينفعش تبقى في مكان زي ده من غير ما تزور أماكن تاريخية وأثرية زي البارثينون، معبد بوسيدون، أكروبوليس أثينا،  ودير دافني.

حاجة تانية هتلاقي منها كتير في أثينا هي المتاحف، كل واحد فيهم بيحكي قصة مختلفة عن زمن فات، عندك متحف الآثار الوطني، اللي فيه أكبر مجموعة من الآثار الإغريقية، متحف الأكروبول، Museum of Cycladic Art، متحف بيناكي، والمتحف المسيحي البيزنطي، في كمان المتحف القومي للفن المعاصر لو بتدور على حاجة فنية مش تاريخية، هتلاقي هناك كل حاجة من لوحات فنية لعمارة تجريبية.

المصدر: Jan M

مش هينفع كل وقتك في أثينا يبقى متاحف ومباني أثرية، الحدائق القومية عبارة عن جنة في قلب البلد، وبتديك فرصة تهرب من زحمة المدينة لمكان كله خضراء ومساحات واسعة كلها مناظر جميلة.

تل ليكابيتوس واحد من أعلى النقط في أثينا، وده مبرر كافي إنك تروح هناك، غير المناظر الخرافية من فوق، عند سفح التل هتلاقي محلات هدايا، كافيهات، ومطاعم كتير تقدر تستكشفهم وتقضي يومك ما بينهم.

أحياء أثينا من أجمل الحاجات اللي ممكن تستكشفها على رجلك، حي بلاكا من الأماكن المبهرة جدًا، ومن أقدم الأحياء في العالم. بس Varvakios Agora هو اللي بيدي فعلًا تجربة مختلفة عن أي مكان تاني، ده عبارة عن سوق أكل المدينة كلها، وفيه كل حاجة ممكن تتخيلها من البسكوت لحد السمك الطازة. مش هتلاقي غالبًا مكان حيوي ومبهج قد ده في أثينا كلها.

حي موناستيراكي هو المكان اللي هتروحه عشان تسهر وتقضي ليلة ظريفة فيها رقص واحتفال، المكان قديم جدًا ومعروف بالبارات على الأسطح بتاعته والبازارات المبهرة ومحلات الهدايا المتنوعة.

رحلات صدة ردة من أثينا

أثينا مكان جميل ومسلي جدًا، آه، بس وارد تلاقي معاك يوم او يومين فاضيين في نهاية رحلتك، وتقدر تقضيهم في استكشاف الجزر اليونانية زي هيدرا، بوروس، وأجانيطس. في كمان تشكيلات ميتيورا الصخرية اللي فيها أديرة معلقة منظرها من أكثر الحاجات المبهرة اللي هتشوفها في حياتك، ومدينة كورنث اللي هتحسها طالعة من فيلم فانتازيا. تقدر في نهاية رحلتك تزور أوليمبيا، المكان اللي زيوس اتولد فيه وكان بيتعمل فيها زمان الألعاب الأولمبية القديمة.

عايز تطلع أثينا ومكسل تظبط رحلتك؟ ممكن تطلع مع Rahhalah Explorers اللي هيظبطوا كل حاجة بالنيابة عنك.

ميلان، إيطالياالمصدر: Four Seasons Hotel

الفيزا

ميلان هتحتاج منك فيزا شنجن، ودي تقدر تقدملها في سفارة إيطاليا في مصر. يستحسن تقدم على الفيزا الشنجن من البلد اللي ناوي تسافرلها علطول، مع إن الفيزا لو خدتها هتدخلك من أي دولة شنجن، بس الدنيا هتبقى أسهل لو مسافر إيطاليا وخدتها من سفارتهم.

تكاليف الرحلة

متوسط الطيران في فترة أسبوع العيد: 6,500 – 6,700 جنيه مصري

متوسط إقامة شخصين ليلة في فندق: 800 – 1,500 جنيه

متوسط إقامة شخص في هوستيل في الليلة: 300 –800 جنيه

متوسط تكاليف الأكل في اليوم الواحد: 200 – 250 جنيه

أعمل إيه هناك؟

كاتدرائية ميلانو من أوائل الأماكن اللي لازم تزورها في المدينة، خدت 600 سنة عشان تتبني وتعتبر واحدة من أكثر المنشئات إبهارًا في العالم.

كنيسة سانتا ماريا ديلي غراسي برضه من المنشئات المبهرة في ميلان، ومن مواقع التراث العالمي لليونسكو. تصميم الكنيسة قوطي وفيها كمان جدارية لواحدة من أشهر اللوح في العالم، العشاء الأخير لدافينشي.

مينفعش تقول إنك رحت ميلان من غير ما تزور Piazza del Duomo، واحدة من أكبر المساحات المفتوحة في العالم، وفيها منحوتات وتحف معمارية كتير في كل حته حواليك، غير المطاعم، الكافيهات، البارات، ومحلات تانية كتير في كل مكان.

حاجة هتلاحظها في ميلان هي المعمار الرهيب، والتحف المعمارية المنتشرة في كل مكان، سواء مباني سان أمبروجيو، من الأقدم في المدينة واتبنت سنة 379 م، أو قلعة سفورزيسكو اللي اتبنت في القرن الخامس عشر، هتلاقي نفسك متحاوط بطوب وحجارة بيحكوا قصص أزمنة فاتت وحضارات اندثرت.

المتاحف والمعارض الفنية متعة تانية في ميلان، Pinacoteca di Brera ده معرض للفنون فيه مجموعة كبيرة من لفنانين إيطاليين زي بيليني، رافاييل، كوريدجو، وغيرهم كتير. عندك كمان متحف ليوناردو دافنشي للعلوم والتكنولوجيا اللي مهدى للفنان والعبقري دافينشي، اللي كان من أذكي البشر اللي عاشوا. هتلاقي رسومات كتير ليه وأعمال مختلفة جوه، توريك قد إيه كان رجل مبدع.

المصدر: Toros Photos

ميلان مش كلها حضارات قديمة ومعمار مبهر، Grand Galleria Vittorio Emanuele II ده أقدم مول في إيطاليا، وتقدر تروح تلاقي هناك كل اللي نفسك فيه، وبرضه عشان دي ميلان، ده مش أي مول عادي. أول ما تخش جوه هتحس إنك دخلت قاعة أوبرا أو متحف، بلوح فنية وأسقف عالية حواليك في تصميم هيبهرك.

بمناسبة قاعات الأوبرا، La Scala Opera هي المكان اللي أي محب للموسيقى الكلاسيكة محتاج يروحه عشان دي من أجمل قاعات الأوبرا في العالم، اتبنت في اواخر 1700 وحضرها فنانين كتير عظماء على مر التاريخ.

لو زهقت من المباني القديمة والمتاحف، Parco Sempione عبارة عن مساحات مفتوحة وحدائق عامة، وهتلافي نوافير ومناظر تانية طبيعية حواليك تديك فرصة تستمتع شوية بالطبيعة قبل ما زيارتك للبلد الجميل ده تنتهي. التمشية في Naviglio Grand برضه تجربة في حد ذاتها، وهتشوف مباني جميلة في كل مكان ومطاعم حلوة لو حبيت تاكل.

مينفعش تمشي من غير ما تزور Basilica di San Lorenzo، واحدة من أقدم كنائس العالم ومن أهم المعالم الدينية في ميلان.

رحلات صدة ردة من ميلان

هتعمل إيه لو عرفت إن البندقية على بعد 3 ساعات سواقة بس من ميلان؟ هتستغرب لو عرفت كمية الأماكن اللي ممكن تروحها من المدينة، أماكن مبهرة لدرجة إنها ممكن تغطي على جمال ميلان نفسه. لو مش حابب تروح البندقية، ممكن تاخد رحلة مركب فاخرة في بحيرة كومو، وبعدها اتمشى شوية في شوارع البلد التاريخية وهتنبسط جدًا. لو رايح كومو، عدي على بيرغامو واستكشف المعمار العتيق والمناظر الطبيعية في كل مكان. محبي النبيذ لازم يزورا Franciacorta  ويجربوا النبيذ الرائع هناك.

إسطنبول، تركياالمصدر: Euractiv

الفيزا

هتحتاج تطلع فيزا تركيا من السفارة في مصر قبل ما تسافر.

تكاليف الرحلة

متوسط الطيران في فترة أسبوع العيد: 6,500 – 6,800 جنيه مصري

متوسط إقامة شخصين ليلة في فندق: 400 – 1,000 جنيه

متوسط إقامة شخص في هوستيل في الليلة: 100 –500 جنيه

متوسط تكاليف الأكل في اليوم الواحد: 85 – 100 جنيه

أعمل إيه هناك؟

مينفعش تقول إنك رحت إسطنبول من غير ما تزور هاجيا صوفيا، واحد من أقدم المباني في العالم، اتبني سنة 537 م، وكان كنيسة في وقت من الأوقات، بعد كده بقى مسجد، ودلوقتي واحد من أشهر متاحف العالم. الزوار بييجوا من كل حتة عشان يشوفوا الموزايك والنقوشات الدقيقة والتصميم المبهر. وإنت هناك، اسأل عن حوض الكاتدرائية او خزان البزايليك الأرضي، اللي عبارة عن إنجاز هندسي تحت الأرض ودلوقتي منور إنارة خفيفة على خلفية موسيقى كلاسيكية، وبيجيله زوار من كل العالم.

إسطنبول معروفة بكونها من أحلى الأماكن اللي ممكن تعمل شوبينج فيها في العالم، جراند بازار هو مركز جنة الشوبينج دي، ويعتبر واحد من أقدم مراكز التسوق في العالم، ومن أكبرهم، بأكتر من 60 شارع و4,000 محل. بيجيله متوسط ربع مليون زائر في اليوم.

من أجمل الحاجات في إسطنبول المعمار المبهر، والمباني المدهشة مع المناظر الجميلة. عندك برج غالاتا اللي بيطل على المدينة كلها في منظر مهيب، وفي كمان مطعم ونادي ليلي فوقه. في كمان المسجد الأزرق (مسجد السلطان أحمد)، اللي يعتبر من معالم البلد، ومفيش رحلة لتركيا تكمل من غير زيارته. لون البلاك هناك اللي محاوط المسجد أزرق، والمعمار الإسلامي المميز كمان حاجات مخلياه تجربة روحانية وجميلة.

المصدر: Istanbul Welcome Card

شارع الاستقلال ممكن يبقى أشهر منطقة في المدينة، وبيجيله فوق ال3 مليون زائر ساعات في الويك إند. هتلاقي فيه كل حاجة ممكن تتخليها، من السينمات والبارات للمطاعم، وبمناسبة المطاعم، لازم تجرب الأكل التركي اللي يعتبر من الاحلى في العالم، والمطاعم هناك بتتفنن في الطبخ والاطباق المميزة. لو حابب تسهر بقى وترقص بالليل، حي أورطة كوي هو المكان الأنسب اللي لازم تروحه.

من أجمل الحاجات برضه اللي ممكن تعملها وإنت هناك إنك تركب باخرة في البوسفور، هتديك منظر لإسطنبول مش هتشوفه تاني وجو تحفة وسط أجواء وأنوار المدينة.

قبل ما تمشي، في تجربة مش سياحية أوي بس لازم تجربها، الحمام التركي. هتحس إنك إنسان جديد ورجعت زي ما اتولدت، والحمام التركي عندهم تخصص هناك وهتلاقي اختيارات كتير عندك.

رحلات صدة ردة من إسطنبول

في أماكن كتير جدًا ممكن تروحها من هناك، الناس بتحب تروح لمقابر جاليبولي إحياءً لذكري فقداء الحرب العالمية التانية، وبعد كده بيتمشوا على شاطىء المدينة الجميل. ممكن بعد كده تطلع على جنق قلعة تشوف صرح طروادة، وتستكشف المدينة الحديثة دي. لو عايز تعرف بقى أهل البلد بيهربوا لفين لما يزهقوا من المدينة، عليك وعلى جزر الأمراء، على بعد رحلة معدية من إسطنبول وبتبقى فعلًا مهرب جميل من المدينة وهادي، ومكان كله مناظر طبيعية.

عايز تطلع تركيا ومكسل تظبط رحلتك؟ ممكن تطلع مع Treks اللي هيظبطوا كل حاجة بالنيابة عنك.

الدار البيضاء، المغربالمصدر: To Europe and Beyond

الفيزا

هتحتاج تقدم على فيزا المغرب من مصر.

تكاليف الرحلة

متوسط الطيران في فترة أسبوع العيد: 6,100 – 6,300 جنيه مصري

متوسط إقامة شخصين ليلة في فندق: 400 – 1,100 جنيه

متوسط إقامة شخص في هوستيل في الليلة: 150 –500 جنيه

متوسط تكاليف الأكل في اليوم الواحد: 80 – 100 جنيه

أعمل إيه هناك؟

لازم تبتدي رحلتك بزيارة مسجد حسن التاني، تاني أكبر مسجد في العالم وواحد من القليلين اللي ممكن غير المسلمين يخشوه. المسجد تصميمه فريد جدًا وبيطل على البحر، والأرضية ازاز، يعني المصلين بيحسوا إنهم بيسجدوا على البحر مباشرة! هو فعلًا تحفة معمارية نادرة لازم كل الناس تشوفها بنفسها.

الدار البيضاء معروفة بشواطئها النضيفة والجو المشمس، La Corniche هو أنسب مكان تستمتع فيه بكل ده. هتلاقي حمامات سباحة، نوادي على الشاطئ، أمواج عالية وناس بتتزحلق عليها، وحاجات تانية كتير هناك.

مول المغرب في أخر الكورنيش، وهو واحد من أكبر مولات التسوق في أفريقيا كلها، هتلاقي هناك كل حاجة ممكن تتخيلها، وحاجات كتير ممكن تتعمل كعائلات أو كمسافر فردي، زي مثلًا حوض السمك الداخلي الكبير اللي عندهم، تزحلق على الجليد، وطبعًا المطاعم والمحلات في كل مكان.

حاجة تانية لازم تعملها في الدار البيضاء هي إنك تتوه في المدينة القديمة، وده من أقدم أجزاء البلد وبيديك احساس بأيام زمان كده وبيعجب الناس جدًا، ما بين الأطفال اللي بتجري في الحواري والمحلات القديمة اللي بتبيع أنتيكات، هتحس إنك مش عايزتسيب المكان أبدًا.

المصدر: Urban Adventures

الحياة الليلية في الدار البيضاء مسلية وممتعة، ولو رحت Sky 28 bar بس اللي بيطل على المدينة كلها، هتعرف قد إيه السهر حلو هناك، هتلاقي أماكن تانية فيها مزيكا لايف ومشاريب حلوة بتتعمل قدامك عشان تبقى سهرة لطيفة.

تاريخ المغرب كبير جدًا وثري فوق ما تتخيل، وكتير من التاريخ ده متركز في الدار البيضاء. عندك المتحف اليهودي المغربي، المتحف اليهودي الوحيد في العالم العربي، هتلاقي فيه تاريخ وتقاليد اليهود المغاربة وحياتهم كانت عاملة ازاي في المجتمع. في كمان Villa des Arts، وده من أكبر المتاحف هناك، والتركيز فيه على الفن المعاصر، ودوره في حضارة وإرث البلد، بيعرض كل ده من خلال أعمال فنية مختلفة. ممكن برضه تروح لقصر الملك وتتأمل تصميمه المبهر والمعمار الدقيق.

رحلات صدة ردة من الدار البيضاء

الرباط هي عاصمة المغرب، وهي على بعد أقل من 90 كم من الدار البيضاء، وتستاهل زيارة وإنت هناك. فيها أماكن تاريخية زي ضريح محمد الخامس، وقصبة الوداية اللي تحسها مرسومة بألوان زيت، وبرج حسن اللي عنده حدائق جميلة تقدر تقضي فيها يوم لطيف جدًا. الجديدة فيها شوية شواطئ جميلة كلها رملة ومباني معمارها على الطراز الأوروبي. تقدر كمان تروح صافي، اللي عبارة عن ميناء صيد أسماك، ومكان كله مناظر طبيعية مبهرة ومباني قديمة جدًا.

مكناس على بعد 3 ساعات سواقة، وتستاهل المشوار، دي واحدة من اجمل المدن الملكية، وفيها كم تاريخ كبير تستكشفه زي متحف الفن المغربي، باب المنصور، المدرسة البوعنانية، وضريح مولاي إسماعيل.

بانكوك، تايلاندالمصدر: Kuoni

الفيزا

هتحتاج تقدم على فيزا تايلاند من مصر.

تكاليف الرحل

متوسط الطيران في فترة أسبوع العيد: 6,900 – 7,100 جنيه مصري

متوسط إقامة شخصين ليلة في فندق: 400 – 1,000 جنيه

متوسط إقامة شخص في هوستيل في الليلة: 120 –400 جنيه

متوسط تكاليف الأكل في اليوم الواحد: 150 – 170 جنيه

أعمل إيه هناك؟

Grand Palace y Wat Phra Kaew من أوائل الاماكن اللي لازم تزورها، المكان عبارة عن منشأ اتبنى سنة 1782، وفضل 150 سنة مركز حكم الملك التايلاندي والبلاط الملكي، انهارده بيجيله زوار من كل حته في العالم يتاملوا تصميمه المبهر وألوانه الزاهية، بالإضافة لتمثال بوذا المنحوت من الزمرد ويعتبر تحفة فنية.

من أجمل التجارب في بانكوك هي ركوب القوارب في الkhlongs، اللي هي عبارة عن قنوات مياه ضيقة بتمشي في شوارع المدينة، بتبقى تجربة جميلة وبتخليك تشوف بانكوك من خلال عين أهلها، غير جمال المدينة والشوارع اللي هتعدي من قلبهم وإنت في المياه. Thonburi من أجمل المناطق اللي ممكن تاخد فيها الرحلة دي، هتشوف حواليك في الحي ده بيوت خشبية ومعابد على تلال وتماثيل بوذا.

Wat Arun من أشهر معابد تايلاند وآسيا كلها، معروف باسم معبد الفجر عشان مع ظهور أول ضوء للنهار الأشعة بتنعكس عليه في منظر أسطوري وبيبقى مميز بشكل كبير. ممكن برضه تزور Wat Pho أو تمثال بوذا المائل اللي ارتفاعه 15 متر وطوله 46 متر! التمثال كله مطلي ذهب ومن الآثار المميزة جدًا في تايلاند. المعبد اللي جواه التمثال كله برضه تصميمه مبهر وممكن تاخد مساج وإنت هناك كمان!

هواه الشوبينج لازم يعدوا على Chatuchak Market، واحد من أكبر الأسواق في العالم، بمساحة فوق ال27 فدان وأكتر من 8000 كشك ومحل. المكان ده بيجيله فوق ال200,000 زائر يوميًا وهتلاقي كل اللي ممكن تتخيله هناك، وبأسعار حلوة مش سياحية كمان. لو عايز شوبينج فاخر شوية عن كده، Siam Paragon ده مول هتلاقي فيه كل الماركات الغالية، غير السينمات والمطاعم. Asiatique The Riverfront  برضه عبارة عن مكان كبير كله محلات وفيه جزء منه مول، هتلاقي مطاعم وبازارات كتير جدًا، ومحلات هدايا في كل حتة.

المصدر: Road Affair

لو عايز سهرة فاخرة وأكل حلو، ممكن تزور برج Sirocco اللي فوقه مطعم فاخر بيقدم أكل حلو ومشاريب غالية، وفي برضه Banyan Tree Bangkok وMoon Bar اللي على ارتفاع عالى وبيطلوا على المدينة في منظر مبهر وقعدتهم حلوة جدًا.

لو حابب تتعرف شوية على تاريخ البلد، متحف بانكوك الوطني فيه أكبر تشكيلة من آثار وفنون البلد، وفيه كل حاجة من أسلحة قديمة وأحجار ثمينة لملابس وأنسجة من عصور فاتت. ممكن تاخد جولة بالإنجليزي في المتحف يوم الخميس مع مرشد بيشرحلك تفاصيل الحاجات اللي بتشوفها.

لو عايز تهرب شوية من زحمة ووجع دماغ المدينة، Lumpini Park فرصتك، المكان عبارة عن حديقة كبيرة جدًا مساحتها نص مليون متر مربع، وهتلاقي دايمًا أهل البلد بيروحوا هناك عشان يفصلوا ويعملوا أنشطة مختلفة.

رحلات صدة ردة من بانكوك

مدينة Ayutthaya القديمة تعتبر موقع تراث عالمي لليونسكو، ولسه لحد انهارده فيها أطلال كتير مبهرة وتماثيل لبوذا وغيره، وفي كمان معابد هناك مختلفة الناس بتروح مخصوص عشان تزورها. أنسب طريقة تستكشف بيها المنطقة دي هي على عجلة، وممكن تأجر واحدة من هناك.

Rose Garden في مقاطعة Nakhon Pathom  عبارة عن مركز ثقافي بيتعمل فيه عروض مميزة جدًا، بعضها استعراضي وبعضها فيه حيوانات زي الأفيال، وبيدوا فكرة عن ثقافة وحضارة البلد من خلال العروض دي. في كمان حاجات تانية ممكن تعملها هناك زي إنك تزرع رز وتنخرط في أنشطة زراعية مع أهل المكان.

لو حابب تاخد تجربة مثيرة شوية، ممكن تروح Samutprakarn Crocodile Farm and Zoo وتشوف التماسيح لايف والمدربين بيلعبوا معاهم بطرق خطيرة زي ما بتشوف على التليفزيون، وفي حيوانات تانية كتير كمان هناك لو مش مرتاح أوي للتماسيح.

Erawan National Park من الأماكن المبهرة جدًا في تايلاند، وبسبب الشلالات بنفس الاسم اللي هناك، اللي لون المياه فيها أخضر زمردي كده ومختلف عن أي حاجة تانية هتشوفها في حياتك. في كهف مشهور جدًا هناك برضه اسمه Ta Duang، وجواه نقوشات ورسومات على الصخر قديمة جدًا.

في كرم مشهور جدًا في تايلاند عشان يعتبر عائم على المياه، في Samut Sakhon، الكرمة مزروعه فوق قنوات مياه في منظر جميل جدًا، وبينقوها الصبح بدري. في جولات مخصوص هناك للسياح عشان يستكشفوا المكان.