share this article

حملات التوعية مستمرة عشان تضم مدن جديدة بعد دهب والغردقة لقائمة المدن الصديقة للبيئة، والمرة دي كانت في مرسى علم اللي أعلن محافظ البحر الأحمر إنها هتدخل مرحلة التطبيق ومنع استخدام البلاستيك خلال الشهور الجاية.

القرار هيتم تنفيذه في مرسى علم بنفس المراحل اللي تمت في الغردقة؛ واللي دلوقتي بقت مدينة خالية من البلاستيك بنسبة 90% ومنتظر إنها تبقى خالية تماماً من الأكياس بنسبة 100% آخر شهر يوليو، لكن قبل المرحلة دي كانت في مرحلة مبدأية خلال شهر يونيو ويوليو واللي بتكون مهمة لجان التفتيش وشرطة البيئة فيها إنها تدوّر على أكياس بلاستيك في أي منشأة تجارية وتتحفظ عليها، لكن من غير تطبيق مخالفات أو غرامات مالية، ومع بداية شهر أغسطس هتبتدي الإجراءات الرسمية اللي هتقفل أي منشأة مش ملتزمة بقرار حظر استخدام الأكياس البلاستيك.

التجربة اثبتت نجاحها لحد دلوقتي وظهرت في الإشادات والتشجيع من شركات السياحة العالمية، على اعتبار إن قرارت زي دي بترفع من تصنيف المدن في مجال السياحة البيئية والمحافظة على البيئة البحرية.

المصدر: المصري اليوم