share this article

مدينة فينيسيا في إيطاليا ابتدت في السنين الأخيرة تحط قواعد شديدة جداً في التعامل مع السياح؛ وده لإنها من المدن الأوروبية اللي بتعاني من "سياحة مفرطة"، عدد سياح بيوصل لحوالي 30 مليون في السنة بيأثر على المزارات بتاعتها وحتى على شكل الحياة للسكان المحليين، وصلت لإنهم غرّموا اتنين سياح ألمان 1058 دولار (17555 جنيه مصري) شافوهم قاعدين على الرصيف بيسخنوا قهوة على بوتجاز صغير من المخصصين للسفر، وفوراً طبّقوا عليهم الغرامة وخرّجوهم من المدينة.

البوليس اعتبر إن مخالفة زي دي مينفعش التساهل فيها خصوصاً إنهم كانوا قاعدين على جسر ريالتو، اللي بيعتبر مزار تاريخي مشهور ومن أقدم 4 كباري موجودين على القناة المائية الرئيسية أو الجراند كانال.

الغرامة دي هي رقم 40 اللي بتتطبق على سياح خلال الشهرين اللي فاتوا بس؛ من ضمن غرامات بتبدأ من 27 دولار وتوصل لـ555 دولار، وعشان يأكدوا طول الوقت على إن تطبيق القوانين هيتم بشكل صارم مع الكل؛ استخدموا هاشتاج للحملة بتاعتهم EnjoyRespectVenezia# اللي بيطالب الناس إنها تنبسط بالبلد لكن كمان تحترمها وتحافظ عليها، فمثلاً مش مسموح إن حد يقعد أو ينام على الأرض أدام المحلات أو المزارات السياحية، ولا إنه يمشي في الشارع مش لابس تيشيرت أو لابس لبس سباحة، ولا حتى إن الناس "تتلكّع" وهي ماشية على الكباري لإن ده بيسبب زحمة وتكتلات من البشر في أماكن كتير في المدينة.

الموضوع كمان مش هيقف عند الغرامة وطرد أي سياح مخالفين من البلد، لكن كمان هيتم التصعيد في حالات معينة بإن البوليس المحلي هيبلغ الجهات المسئولة في سفارة أو قنصلية البلد اللي السياح جايين منها، بالتالي ده ممكن يأثر على أي محاولات مستقبلية ليهم إنهم يرجعوا يزوروا فينيسيا تاني.

المصدر: BBC