share this article

الموضوع ده اتنشر أول مرة على موقع "مشروع سفر"، ويعاد نشره في "سفرية" بالإتفاق مع إدارة الويب سايت.

وأنا في مطار كوالالمبور مستني الطيارة اللي هتوديني على دبي ومنها للقاهرة كنت بفكر يا ترى الرحلة الجاية هتكون فين؟ مكنتش متردد ولا الاجابة احتاجت تفكير طويل؛ قلت لنفسي أنا رحت آسيا وأوروبا وعايز أروح قارة جديدة وأماكن جديدة، الإجابة ببساطة كانت أفريقيا.

بعد ما استقريت على القارة؛ الوقت جيه عشان أحارب على أجازة طويلة في الشغل وعرفت آخد أجازة أسبوعين؛ ودورت على تذاكر طيران من يوم الخميس بالليل ليوم الأحد اللي بعد ١٧ يوم الصبح، رحلة لمدة ١٧ يوم في أفريقيا، وكنت وقتها بفاضل بين كينيا وتنزانيا وتونس والمغرب.

بعدها كانت المفاضلة بين تونس والمغرب؛ قدمت على فيزا تونس ولسبب ما لسه معرفهوش أخدت رفض، بعدها قدمت ورقي عشان آخد فيزا المغرب وأخدتها بسهولة وقررت أقضي 17 يوم في المغرب ابتديت بالجزء الجنوبي وكملت رحلتي لحد مدن الشمال.

اللهجة المغربية

بدأت ابعت لمغاربة على كاوتش سيرفنج couchsurfing وعملت صداقات مع مغاربة قبل سفري بثلاث أسابيع، وعرفت إني هقابل مشكلة وحيدة اللي هي اللهجة لأنها مختلفة تماماً عن أي لهجة عربية، واللهجة المغربية مختلفة من مدينة لمدينة فابتديت اتعلم من على يوتيوب كلمات مغربية واساسيات اللهجة عشان أقدر اتحرك بشكل أسرع في المغرب وابقى أقرب للمغاربة والثقافة المغربية.

التجهيز للسفر والهوستيل

كانت خطتي كالتالي: كازابلانكا – الرباط – مراكش – أوريكا – مكناس – إفران – فاس – شفشاون – تطوان – طنجة

لقيت تذاكر طيران على المغربية بـ٤٢٠٠ جنيه ولقيت الهوستيلز رخيصة في كل المدن اللي هزورها باستثناء الرباط وكازابلانكا، المهم وصلت لكازابلانكا ودورت على هوستيل ولقيت هوستيل رخيص ودي كانت أول مرة أسافر وأنا مش محدد هقعد فين، بس اكتشفت إن الأسعار الموجودة على بوكينج ممكن تلاقي أرخص منها بكتير لو دورت على رجلك بنفسك في المدينة اللي هتزورها.

ملاحظات سريعة عن المغرب:

1- أنا زرت أكثر من بلد في أوروبا وآسيا بس المغرب أجمل بلد زرتها لغاية دلوقتي وده بسبب التنوع الكبير اللي مش موجود في أي بلد زرتها قبل كده ولقيته في المغرب.

2- المغاربة أطيب وأجدع واكتر شعب مضياف شفته بجد، ٣ مغاربة استضافوني في بيتهم في تطوان ومكناس وفاس، عرب وامازيغ ناس طيبين وروحهم جميلة واللي عايز يعرف معنى كلمة الكرم يروح المغرب.

3- اللهجة المغربية أو زي ما بيسموها (الدارجة) مش صعبة، أنا اتعلمت الأساسيات قبل ما أسافر؛ بعد ما سافرت عانيت أول يومين عشان عقلي كان عقبال ما يترجم الكلام من المغربية للمصرية كان بياخد وقت بعد كده بقت سهلة بالنسبالي إني أفهمها، لهجة جميلة جداً وفيها مفردات عجبتني جداً، زي مثلاً لو حد سألك إنت اتولدت فين؟ في المغرب بيقولوا بدل اتولدت (اتخلقت) وبيستخدموا كلمة بصير بدل أعمى.

4- تمشي من مدينة لمدينة مسافة ٥٠ كيلو بس تحس إنك رحت دولة مختلفة!

على سبيل المثال من مكناس المدينة القديمة الرائعة لمدينة إفران سويسرا المغرب لفاس المدينة القديمة اللي مختلفة عن مكناس تماماً! الدارجة كمان مختلفة من مدينة لمدينة.

5- بلدين زرتهم وحسيت إن البلد والحكومة بتعمل كل اللي تقدر عليه عشان السائح يتبسط ويرجع تاني للبلد المغرب وتايلاند.

6- الدنيا منظمة في المغرب بالنسبة للمواصلات، فمثلا التاكسي عندهم نوعين: تاكسي كبير وده بيكون خط سيره من مدينة لمدينة وبيكون ليه محطات اسمها المحطة الطرقية؛ ودي زي موقف الأتوبيس بتاخد منها التاكسي وبيكون عربية مرسيدس قديمة وبيشتغل بالنفر لما يكمل ٦ أشخاص بيتحرك، أما داخل المدينة فموجود تاكسي صغير وده خط سيره بيكون داخل المدينة بس وبتحاسب بالعداد، وعموماً المغرب فيها شبكة مواصلات كويسة جداً وتقدر تروح كل المدن عن طريق القطار أو الباص.

7- الأكل المغربي رهيب رهيب رهيب! اعملوا حسابكم إنكم هترجعوا مصر زايدين في الوزن بسبب الأكل هناك.

8- أنا قابلت في الـ١٧ يوم أكتر من ٤٠ مغربي أغلبهم عرفتهم من couchsurfing واحتكيت بالمغاربة في المواصلات وفي جولاتي بكل مدينة، أقدر أقول بكل ثقة إن أغلب المغاربة بيحبوا مصر جداً، كان إحساس جميل جداً إني أصحى من النوم في شفشاون أو كازابلانكا وأنزل أدور على مكان أفطر فيه أسمع في الطريق وأنا ماشي أم كلثوم، بالمناسبة عادل إمام ليه شعبية رهيبة جداً في المغرب وناس كتير قابلتهم حافظين إفيهات الأفلام بتاعته.

9- لما كنت بتوه في مكان وأسأل الناس على الطريق فيسالوني إنت منين أقولهم أنا من مصر، مش هقولكم كمية المحبة اللي كنت بشوفها في عيون المغاربة قبل ما اسمع منهم إن شاء الله مصر ترجع زي الأول، الشعب المغربي شعب طيب ومعندوش أحقاد على أي شعوب تانية وبيتمنوا الخير للكل ومحبين لكل الشعوب مش المصريين بس، المغرب بصراحة جميلة بشعبها.

10- المغرب على عكس أغلب الدول اللي زرتها قبل كدة الواقع أحسن من الصور مليون مرة، أنا بصراحة خصوصاً في آسيا كنت بشوف صور وهمية لأماكن كتير ولما أروح اتصدم إن الواقع مش حلو زي الصور؛ عكس المغرب بصراحة الطبيعة اللي شفتها في المغرب طبيعة مشفتهاش في أي مكان زرته قبل كده.

11- المغرب بلد رخيصة سياحياً، الهوستيلز هناك رخيصة، المواصلات معقولة، الأكل رخيص والطيران كمان مش غالي، يعني لو بتدور على تجربة جديدة أنصحك جداً بالمغرب بس اتعلم الدارجة شوية قبل ما تسافر، من ٣٠ – ٤٠ دولار يكفوك يومياً إقامة وأكل وفسح.

12- المغرب دولة مش كبيرة من حيث المساحة بس فيها أكتر من ٩ أو ١٠ مدن يستحقوا الزيارة فحاول تزورها أقل حاجة ١٠ أيام ومتقعدش كتير في كازابلانكا والرباط.

13- سفارة المغرب من أكثر السفارات المحترمة اللي اتعاملت معاها لأنهم مش بياخدوا منك تمن الفيزا إلا لو خدتها، إنت بتقدم ورقك ومش بتدفع حاجة لو خدت الفيزا بتدفع تمنها لو مخدتهاش بتاخد باسبورك ومبتدفعش حاجة.

14- مرة تانية اتعلم بعض الكلمات من اللهجة المغربية (الدارجة) قبل سفرك عشان تجربتك تكون ممتعة وتحتك بالمغاربة بشكل أفضل وتقدر تفهم ثقافتهم وأسلوب حياتهم ودي متعة السفر الحقيقية.

15- الموسيقى الأمازيغية روعة.

16- الجميل في المغرب إن الطبيعة متنوعة هناك، يعني عايز جبال هتلاقي جبال، عايز شلالات هتلاقي، بحيرات، مناظر طبيعية، والأجمل إن كل مدينة ليها طابع خاص بيها في المعمار، يعني شفشاون مدينة كل مبانيها وبيوتها وحتى عمدان النور باللون الازرق، مراكش المدينة الحمراء، كازابلانكا المدينة البيضاء؛ أنا عيني استمتعت بالألوان اللي أنا شفتها في الـ١٧ يوم دول.

17- أخيراً؛ متحكمش على مكان قبل ما تزوره، أنا مكنتش مقتنع مثلاً بماليزيا إنها جميلة قبل ما ازورها ولما زرتها حبيتها جداً جداً، كل واحد فينا عينه بتشوف الجمال بشكل مختلف وعنده معايير معينة للجمال، اللي بالنسباله الجمال في الشواطئ الجميلة واللي بيحب الجبال واللي بيحب السهر والحفلات؛ مش شرط المعايير دي تتطابق معاك، سافر وشوف الجمال بعينك إنت بس، كمان متحكمش على شعب قبل ما تتعامل معاه؛ الصور النمطية أو الـstereotypes دي أغبى حاجة ممكن الواحد يصدقها، أنا بحب دايما الناس اللي بتستخدم جملة “أنا شفت” مش بيقولوا وبس.

الناس اللي بيحبوا يقابلوا أهل البلد أو الـlocals في كل بلد بيسافروها والناس اللي عايزة تتعلم من السفر زي حالاتي، اللي بالنسبالها السفر وسيلة إنها تعرف ثقافات، أسلوب حياة وعادات وتقاليد مختلفة وتتحط في مواقف صعبة وتقدر تتخطاها؛ وتتحدي نفسها وتوظف خبرتها اللي أخدتها عن طريق السفر عشان تخليها أفضل في حياتها بعد ما ترجع من السفر، أنصحكم بزيارة دول مختلفة في قارات مختلفة وخلي عينك تشوف أماكن مختلفة وودنك تسمع لقصص جديدة واستمتع بجمال واختلاف البشر والعالم.