share this article

 

 

من حوالي 150 سنة، جول فيرن نشر روايته المحبوبة جدًا "حول العالم في 80 يوم"، اللي فيها بطل الرواية فيلياس فوج بيحاول يلف العالم في 80 يوم بالظبط عشان يكسب رهان. طبعًا مش هتلاقي ناس كتير عملت الإنجاز ده في الحقيقة من ساعة ما الرواية طلعت، بس موقع Airbnb دلوقتي هيدي الناس الفرصة إنهم يطلعوا رحلة مستوحاة من الكتاب الشهير، وهتبقى تجربة مدهشة.

الرحلة اللي Airbnb عاملها هتبقى متاحة لعدد مش كبير من الناس، وهيروحوا فيها 18 بلد في 6 قارات على مدار 80 يوم، وهتتكلف 5,000 دولار للشخص. الرحلة شاملة معظم التكاليف، وهتبدأ يوم 1 سبتمبر وتخلص يوم 19 نوفمبر. مبلغ ال5,000 دولار هيشمل الإقامات المختلفة في كل حاجة من بيوت لإيكولودج، المواصلات بأنواعها من أول الطيارات والزوارق لحد الهليكوبتر والمنطاد، وكمان معظم الوجبات. هتحتاج بس تدفع التذكرة الرايح جاي للمدينة اللي هتتحرك منها، لندن، وتكلفة وجبات معينة، وتكاليف بسيطة ممكن تطلع في النص. بحسبة بسيطة، اليوم هيقف عليك بحوالي 60 دولار، وده طبعًا رقم حلو جدًا.

الرحلة هتبقى مليانة مغامرات، وفي حاجات كتير هتحصل في وقت قليل. أول أسبوع المسافرون هيروحوا إنجلترا، رومانيا، وأوزبكستان، وبعد كده الشرق الأوسط، أجزاء من أفريقيا، آسيا، أستراليا، وشمال وجنوب أمريكا، قبل أخر محطتين، آيسلندا وإنجلترا تاتي. ال18 بلد هم إنجلترا، رومانيا، أوزبكستان، مصر، الأردن، إثيوبيا، كينيا، نيبال، بوتان، تايلاند، الصين، أستراليا، نيوزيلندا، اليابان، أمريكا، الإكوادور، تشيلي، وآيسلندا. هتعمل مغامرات كتير في كل بلد، حسب إيه المشهور هناك، زي التمشية وسط الثلج في تشيلي، سفاري في أفريقيا، التمشية في تلال الهيمالايا، والطفو في البحر الميت. تقدر تعرف جدول الرحلة الكامل من موقع Airbnb.

الرحلة ليها كمان بعد اجتماعي، عشان كده 100% من فلوسك هتروح لMalala Fund، اللي بيهدف لمساعدة البنات في سن 12 أو أكبر إنهم ياخدوا تعليم كويس وحر. موقع Airbnb لسه ما أعلنش عدد الرحلات المتاحة، بس أول دفعة عبارة عن 6 تذاكر هتبقى متاحة يوم 20 يونيو على الموقع، والدفعة التانية هتبقى يوم 27 يونيو، والتالتة والأخيرة يوم 1 يوليو. عشان تعرف المواعيد بالظبط، خش على انستاجرم Airbnb adventures، يمكن تبقى من المحظوظين اللي هيطلعوا رحلة العمر دي!

 

المصدر: Thrillist