share this article

من أهم الأسباب اللي بتخلي رحلة أوروبا سهلة للي بيحب السفر هي إن التنقل بين الدول الأوروبية نفسها سهل؛ وأحياناً إنك تسافر بين بلدين أسهل وأرخص من إنك تسافر بين مدينتين، السهولة دي جات من وسائل مواصلات وانتقالات كتير من ضمنهم الـcarpooling أو إنك تشوف من خلال مواقع وتطبيقات مين معاه عربية ورايح نفس المكان اللي إنت رايحه؛ ياخدك في سكته في مقابل فلوس قليلة أو تقسموا فلوس البنزين عليكم مثلاً، وأشهر خدمة في أوروبا بتقدم ده هي BlaBlaCar، اللي قرروا دلوقتي إنهم مش هيكتفوا بالعربيات لكن كمان هيوفروا للمسافرين أتوبيسات بأسعار رخيصة.

أسعار التذاكر بتبدأ من 5 يورو ومسموحلك بشنطتين سفر مع شنطة الإيد أو الـcarry-on، ده غير إن الأتوبيسات مجهزة بإنترنت WiFi وكهرباء عشان تشحن موبايلك أو اللابتوب، لكن لسه الخدمة مبدأتش غير في دول معينة ووصلت لحد دلوقتي لـ300 وجهة مختلفة وخطوط شغالة عليها الأتوبيسات في: فرنسا، ألمانيا، إيطاليا، البرتغال، لوكسمبورج، سويسرا، هولندا وبريطانيا،  وكمان موجودين في مدينة طنجة في المغرب.

المصدر: The Sun