share this article

شركة Lonely Planet "لونلي بلانيت" اللي بتعتبر أكبر مرجع ودليل للسفر حوالين العالم، أعلنت عن قايمة أفضل 10 مدن بتوصى بزيارتها والسفر ليها في 2020، الخبر الحلو بقى إن القاهرة ودبي من الأماكن اللي وصت بيها وهما المدن العربية الوحيدة اللي كانت في القايمة.

القاهرة جت في المركز التالت في قايمة لونلي بلانيت، ووصفتها بأن فيها فوضى في أجمل صورة، وفيها تقدر تغوص في تاريخ وماضي مصر، عن طريق زيارة الأهرامات ومتحف الفن الإسلامي والأزهر والمتحف القبطي وخان الخليلي، ده غير المتحف الكبير اللي هيتفتح السنة الجاية، وهو من أهم الحاجات اللي ركزت عليها القايمة، لأنه هيكون أكبر متحف في العالم مخصص لحضارة واحدة.

لونلي بلاينت كمان قالت إن الرحلة للقاهرة مختلفة عن أي تجربة تانية، وإن أي تمن قليل جدا مقابل الاستمتاع بالمكان اللي كلنا بنسميه "أم الدنيا".

أما دبي فجت في المركز التاسع، ووصفتها قايمة لونلي بلاينت بإنها "مثيرة للتقاليد العميقة والرؤية المستقبلية الطموحة الملفوفة في روعة الصحراء المفعمة بالحيوية".

القايمة قالت عن دبي إنها مليانة بطرازات هندسية معمارية هي الأحلى على مستوى العالم، ده غير إن فيها برج خليفة اللي هو أطول مبنى في العالم، وحديقة "Dubai Miracle Circle" التي بتعتبر من أكبر حدائق الزهور في العالم، وكمان متحف الأوهام وكأس الطائر وقرية المخرج ومرسى دبي.

 المصدر: ألوان الوطن