share this article

في أولويات كده في أي سفرية عبارة باسبورك شنطتك فلوسك جوجل مابس، وطبعا جوجل مابس مفيش غنى عنه لأنه الدليل بتاعنا اللي بنمشي وراه وإحنا مغمضين، بس لو كنت في إيطاليا وتحديدا في جزيرة سردينيا اقفل جوجل مابس خالص ومتمشيش وراه، ده مش كلامنا إحنا ده كلام السلطات في الجزيرة هناك.

السلطات في بلدية بائوني في منطقة نوورو حذروا السياح من استخدام جوجل مابس في الجزيرة، لأنهم بيمشوا وراه بهدف إنهم يروحوا شواطئ ويكتشفوا أماكن جديدة، لكن الموضوع بينتهي بإنهم بيتوهوا وبيلاقوا نفسهم في الآخر في مكان مهجور ومش عارفين يخرجوا منه، وبيضطروا يطلبوا المساعدة من البلدية عشان يخرجوهم من المكان ده.

البلدية بدأت تحذر الناس من جوجل مابس في الجزيرة بعد ما وصلهم 144 طلب مساعدة من ناس بتسوق أو متسلقين جبال في آخر سنتين، وده خلى البلدية تزود عدد اليفط فيها باللغتين الإنجليزي والإيطالي بتحذرهم من إنهم يمشوا ورا جوجل مابس وإنهم يستخدموا الإشارات الموجودة في الشوارع أو استخدام خرايط للبلد موثوق فيها أو إنهم يستعينوا بدليل سياحي محلي.

طبعا البلدية بلغت أبلكيشن جوجل مابس بالمشكلة دي، والناس في الأبلكيشن قالوا إنهم شغالين على حلها وإنهم هيدوروا على طرق فعالة عشان يحذورا السواقين والسياح من تضاريس الشوارع من غير ما يتوهوا.

المصدر: CNN