share this article

مصر بقالها فترة كبيرة بتحاول بكذا طريقة تحسين وإحياء السياحة، والموضوع ماشي كويس في المطلق والسياحة فعلًا ابتدت تقف على رجليها في البلد. في أخر تطورات المجهودات دي، وزارة السياحة أعلنوا إنهم هيوقعوا اتفاقية مع CNN للترويج للسياحة في مصر. الصفقة دي جزء من جهود الوزارة في البرنامج الإصلاحي اللي معمول عشان يغير طريقة تفكير الناس في الوجهات السياحية في البلد.

وزيرة السياحة رانيا المشاط لسه مشاركة في منتدى السياحة العالمي في سويسرا من كام يوم، ومصر اختيرت في المنتدى كنموذج لتخطي العقبات والتحديات اللي بتواجه محال السياحة. الوزيرة ادت خطاب عن السياحة في البلد وازاي مصر قدرت تتخطى المشاكل اللي قابلتها في خلال الكام سنة اللي فاتوا. ده كان منتدى واحد بس من اللي مصر كانت مركز الاهتمام فيهم، الوزيرة رانيا المشاط كمان حضرت منتدى السفر العالمي في أخر 2018، وكمان منتدى السفر العربي الأسبوع اللي فات، كل ده في دعاية للسياحة في مصر وشرح خطط البلد المستقبلية ومشاريعها زي المتحف المصري الكبير اللي هيبقى أهم حدث في السنة الجاية.

كان في كمان اتفاقية وقعتها الوزيرة مع منصة السفر Beautiful Destinations اللي برضه هتبقى بتروج للسياحة في مصر من خلال منصاتهم المختلفة اللي عليها ملايين المتابعين.

مصر خدت جايزة من المجلس العالمي للسفر والسياحة في بداية السنة دي، لمجهودات البلد في الترويج للسياحة وقدرتها على التغلب على التحديات والعقبات اللي واجهت قطاع السياحة. الاتفاقية اللي اتعملت مع الCNN دي متوقع هتقوي مركز مصر كالوجهة السياحية رقم 1 في القارة.

المصدر: Egypt Today