share this article

إحنا بقينا كلنا بنفكر قبل ما نروح من بيتنا لمكان تاني يا ترى الناس دي عيانة، ولا حاملين للفيروس ولا إيه، الموضوع بقى هاجس في عقولنا محدش عارف مين شايل إيه وده وإحنا بنتحرك في نطاق ضيق يكاد يكون محصور، اللي هو أنا مش هروح أشوف حد أنا عارف إنه عنده كورونا أو عنده أعراض تخلينا نشك، فما بالك بقى لو عايزين نتنقل من بلد لبلد؟

الحكومات دلوقتي بتفكر إنها تتجه لوثيقة إضافية عن صحة المسافر، ودي هتكون أغلب الظن الكترونية يعني على الموبيل بتاعك بس لازم تطلعها قبل ما تركب الطيارة أو أي حاجة هتنقلك من بلد للتاني، ولما توصل تتقاس حرارتك، الوثيقة دي فيها ما يثبت إنك سليم معافى مفيش أعراض فيروس كورونا، بس منظمة الصحة العالمية بتقول إن إحنا مش هينفع نعتمد في الـ Health Passport ده على إختبار الأجسام المضادة لأنه لغاية دلوقتي إحنا مش متأكدين إن الناس اللي جالها كورونا مش هيرجع يجيلها تاني حتى بعد ما جسمه عمل أجسام مضادة للفيروس، الموضوع لسه قيد التفكير والتطوير في بلاد زي ألمانيا وإنجلترا وفرنسا اللي لسه بيناقشوا كمان هيفتحوا حدودهم إمتى وإزاي، أما اليونان وإيطاليا اللي فتحوا بالفعل فهم عايزين الناس يكون معاهم الـHealth passport اللي بيوضح الحالة الصحية للمسافر وطبعا يكون عمل تحاليل فيروس كورونا قبل ما يسافر ومعه شهادة إنه معندوش حاجة. الـHealth Passport مش حاجة جديدة هي حاجة موجودة لكن مش متعارف عليها أوي، زي أبليكشين بتدخل عليه معلومات عن صحتك فصيلة الدم، أمراض مزمنة، عمليات عملتها نتايج الفحوصات الطبية، يعني ملفك الطبي الخاص.

المصدر: Lonely Planet