share this article

خطوات ثابتة جداً ماشية بيها عملية تطوير السياحة في مصر بإنجازات كتير حصلت الفترة اللي فاتت، أولها كان إن مصر اتقدمت 9 مراكز في مؤشر التنافس في السفر والسياحة في تقرير منتدى الاقتصاد العالمي؛ واللي بيقيس حجم التطور السياحي اللي بيحصل عالمياً، ودلوقتي حققت إنجاز كمان في عائد السياحة لسنة 2019 واللي وصل لـ12.6 مليار دولار السنادي، أكبر عائد على الإطلاق تحققه البلد في قطاع السياحة. 

وزيرة السياحة رانيا المشاط أعلنت ده في نهاية مشاركة مصر في بورصة لندن السياحية World Trade Market WTM، اللي كان فيه أكتر من 50 ألف مشارك من 180 بلد في العالم، وقدر الوفد المصري من خلاله إنه يوقّع عقود تعاون كبيرة لزيارة مصر الفترة الجاية، غير كمان الشركات العالمية اللي زارت الجناح المصري وأعلنت اهتمامها إنها تدخل السوق المصري وتستثمر في السياحة. 

الملفت إن حجم العائد ده حصل قبل حتى قرار بريطانيا رفع حظر السفر لشرم الشيخ، بالتالي متوقع إن الانتعاش هيزيد أكتر الفترة الجاية بعد ما خطوط طيران كتير هترجع تستأنف رحلاتها لمصر، وبعد كمان الافتتاح المنتظر للمتحف المصري الكبير اللي هيبقى في أكتوبر 2020.

المصدر: Travel Weekly