share this article

أول ما تيجي سيرة إندونيسيا مش بييجي في بالنا غير جزيرة بالي؛ رغم إن إندونيسيا فيها أكتر من 18 ألف جزيرة! عشان كده الحكومة الإندونيسية قررت إنها تعمل خطة عشان تلفت نظر الملايين اللي بيزوروا بالي كل سنة، وقررت تسمي المشروع الجديد ده "10 بالي جديدة"!

الهدف من المشروع ده مش إنهم يغيروا وجهة السياح من بالي لأماكن تانية، لكن إنهم يطوروا من الجزر والمدن التانية سواء من ناحية البنية التحتية أو المطارات وشبكات المواصلات اللي موجودة في الأماكن دي وبتربطها ببعض، واللي من ضمنها جزيرة نوسا تنجارا Nusa Tenggara، معبد بوروبودور Borobudur Temple اللي بيعتبر من أكبر المعابد البوذية في العالم في جزيرة جاوة، جزر وشواطىء سيمورو، بحيرة توبا، ومنطقة الألف جزيرة Thousand Islands في جاكرتا.

ومن ضمن الخطوات اللي هتتنفذ على أرض الواقع قريب هيكون افتتاح المطار الجديد في يوجياكارتا في جزيرة جاوة؛ اللي بتعتبر العاصمة الثقافية لإندونيسيا ومقر السلطنة، ومتوقع بعد افتتاح المطار الجديد إن حركة السياحة هتبقى أكبر لجزيرة جاوة ومعبد بوروبودور على نهاية 2019.

المصدر: Lonely Planet