share this article

أعتقد كلنا حلمنا بحياة الجزيرة الهادية المعزولة؛ وممكن حلمنا إنها فكرة هروب من دوشة حياتنا اليومية، وماله يعني لما يكون عندنا الرغبة نعيش في مكان أبسط وأهدى كلنا محتاجين ده في وقت في حياتنا، ولو دي فكرة مرعبة بالنسبة لك وبتحب طول الوقت تفضل محاط بالناس وتتواصل معاهم بكل الطرق المختلفة فالشغلانة دي مش ليك.

فيه جزيرة في الجنوب الغربي لأيرلندا أعلنت إنهم محتاجين شخصين يمشّوا الدنيا في الجزيرة، الجزيرة اسمها Great Blasket، الشخصين دول هيكونوا بيتولوا إدارة الجزيرة اللي عليها 3 أكواخ ممكن يوصل عدد النزلاء فيهم لـ21 شخص، والناس دي بتحتاج حد يقدملها قهوة؛ شاي أو سناك، وطبعاً يباشر الحجوزات والتسكين والحاجات دي، ويشغّل الكوفي شوب اللي هناك، حاجة كده هادية ورايقة ولطيفة.

الشغلانة دي أعلنوا عنها على تويتر -أصل الجزيرة عندها حساب على تويتر-، وقالوا إنها هتكون لمدة 6 شهور من أبريل لغاية أكتوبر، وصحيح هم في الإعلان مجابوش سيرة المرتب لكن الإقامة والأكل عليهم، بس اعمل حسابك إن مفيش WiFi هناك يعني إلى حد ما جزيرة مقطوعة، ومفيش كهربا ولا مياه سخنة، بس فيه طاحونة هواء بتولد كهربا على أد إنها تشحن جهاز مثلاً، لو عايز بقى تقدم يادوب تلحق عشان فيه ناس من كل مكان في الدنيا بعتت لدرجة إن وصلهم حوالي 7000 طلب في أول 6 أيام بس بعد الإعلان.

ممكن تبعتلهم على إيميل info@greatbasketisland.net لواحدة اسمها أليس اللي جوزها عنده مركب بتعمل رحلات للجزيرة، وأصلاً هو سليل العيلة اللي كانت في وقت بتملك أغلب الجزيرة، المهم إنهم رمموا الأكواخ وبقت بتستقبل ناس، الشرط الوحيد للشغلانة إن الإتنين اللي يقدموا يكونوا يا إما أصحاب، أو مرتبطين، وطبعاً لازم يكونوا إجتماعيين وبيحبوا الحركة والشغل.

المصدر: Matador Network