share this article

بعد قرار رئاسة الوزراء اللي أعلنوا عنه امبارح بوقف حركة الطيران تماماً في مصر من أول 19 مارس لحد 31 مارس؛ وزير الآثار والسياحة د. خالد العناني قال إن الوزارة هتستغل الفترة دي في إنها تعمل عملية تعقيم وتطهير شاملة للفنادق والمراكب النيلية.

الوزير وضّح إن الإصابات اللي اكتشفوها في مصر بفيروس كورونا كانت كلها بسبب اختلاط الناس بالأجانب أو أشخاص مصريين راجعين من برة، عشان كده اتعاقدوا مع شركات أجنبية للتعقيم؛ وبالتنسيق مع وزارة الصحة والسكان واتحاد الغرف؛ عشان يتابعوا عملية تعقيم الفنادق والمنتجعات السياحية والمراكب؛ وكمان عشان يكشفوا على كل العاملين في قطاع السياحة.

ورغم حجم الخسارة اللي هتحصل في قطاع السياحة خلال الفترة دي؛ واللي الوزير قال إنها هتوصل لمليارات خصوصاً إن نسبة إلغاء الحجوزات السياحية وصلت لـ60% بسبب انتشار فيروس كورونا، ولأن كمان معظم شركات السياحة الأجنبية وقفت تماماً شغلها ورحلاتها لأي حتة في العالم، لكن الوزير قال إن فيه فريق من الوزارة لسه شغال على الخطط اللي كانت محطوطة والشغل الخاص بالمتحف المصري الكبير سواء بخصوص الحملات الدعائية أو عملية نقل الآثار للمتحف، بحيث يكون جاهز للافتتاح مع مراقبة المستجدات اللي بتحصل على التوازي.

المصدر: Youm7