share this article

بما إن العالم كله أعلن حالة الطوارىء بسبب فيروس كورونا؛ السعودية قررت إنها توقف مؤقتاً دخول أي حد للأراضي بتاعتها سواء سياحة أو حتى عشان العمرة والمسجد النبوي، خصوصاً من الدول اللي فيروس كورونا موجود بنسبة خطر فيها أو اتسجلت على الخريطة العالمية إن الفيروس وصلها.

القرار كمان هيتطبق على المواطنين السعوديين ومواطني دول الخليج اللي بيعدّوا من وإلى السعودية ببطاقة الهوية الوطنية، هيعملوا استثناء بس في حالة إن فيه سعوديين بالفعل خرجوا من المملكة وعايزين يرجعوا تاني، أو لو فيه مواطنين خليجيين موجودين في المملكة وعايزين يرجعوا بلدهم.

الخارجية السعودية قالت في البيان بتاعها النهارده إن ده إجراء وقائي مؤقت وطبيعي عشان يمنعوا وصول الفيروس وانتشاره في المملكة، خصوصاً لأن مكة والمسجد النبوي بتجمع فيها آلاف البشر من كل حتة في العالم، ورغم إنهم لسه متسجلش عندهم أي حالات رسمية مؤكدة لكن اتسجل في دول جيران زي الكويت والبحرين والإمارات.

المصدر: Time