share this article

للمرة التانية هيتعمل رحلة مشي hiking للبنات فقط في درب سيناء، بعد ما عملوا أول رحلة في مارس اللي فات وكان كل المشتركين فيها بنات ومرشدات الجبال كانوا سيدات من القبائل البدوية في جنوب سيناء، قرروا يعملوا رحلة تانية في سبتمبر بقيادة قبيلة الجبلية.

الرحلة هتبقى عبارة عن مغامرة استكشافية البنات هيقضوا فيها 3 أيام من 20 لـ22 سبتمبر؛ ورغم إنها المرة دي هتكون مع مرشد للجبل راجل مش ست؛ لكن هيكون فيه مجموعة مرافقة من ستات القبيلة، وده هيكون فرصة أكبر للبنات اللي هيطلعوا الرحلة دي إنهم يقضوا 3 أيام وسط القرى والقبائل البدوية، يشوفوا حياة الستات فيها وعيشتهم وثقافتهم ويدخلوا بيوتهم اللي هتبقى تفاصيلها متعة في حد ذاتها.

اليوم الأول في الرحلة هيبتدي بمقابلة دكتور الطب بالأعشاب؛ وهو واحد من البدو في القبيلة، وبعده مقابلة تانية  مع واحدة من الستات البدويات اللي بيطرزوا شنط يدوية، بعدها "زهرة" صاحبة محل الفواكه العضوية المجففة، وفي آخر اليوم هيكون فيه تمشية لوادي زيتون اللي هيكون في جنينة وسط الجبل هيقضوا فيها أول ليلة استعداداً لرحلة المشي hike تاني يوم الصبح.

بعد رحلة المشي هيقضوا الليلة التانية في جنينة جديدة وسط الجبل مع عائلة بدوية، وفي آخر يوم هيكون فيه فقرة راحة واستجمام مع سيدة بدوية في الجنينة بتاعتها اللي هتكون آخر محطة في الرحلة.

تكلفة الرحلة دي كلها هتكون 2800 جنيه شاملة كل حاجة من أول المواصلات للأكل والإقامة، وأي حد عايز يبقى جزء من التجربة المميزة دي يقدر يعرف كل تفاصيل الحجز من خلال صفحة الإيفينت على الفيسبوك.