share this article

ظهرت على السوشيال ميديا من فترة كده خناقة بين الناس اللي بتسافر مع أطفالهم والناس اللي معندهاش أطفال أو مش بيسافروا بيهم، بسبب الإزعاج اللي ممكن يسببه الطفل في الطيارة، وزي ما الأم مالهاش ذنب في عياط الطفل او قريفته أو خوفه، فالمسافرين على الطيارة برده هما كمان مالهومش ذنب في ده، عشان كده موقع "إير بير" حب يلاقي حل للمعضلة دي.

الموقع بيوفر "جليسة أطفال" ممكن تسافر معاك وتاخد بالها من أطفالك طول مدة الرحلة، بتشيل شنطتهم وكل الحاجات الخاصة بيهم، وتحط عينها عليهم طول الرحلة وتحاول تلعب معاهم وتسليهم عشان ميزنوش أو يعيطوا أو حتى يعملوا دوشة تزعج باقي الركاب، كمان هتأكلهم وتغيرلهم هدومهم لو احتاجوا، ولو ناموا هتكون متكفلة إنها تشيلهم عشان يناموا بشكل أفضل.

طبعا أول حاجة جت في بالك دلوقتي إنك هتحجزلها تذكرة معاكوا وأنتوا مسافرين وهتدفع دم قلبك، لكن مش ده اللي الموقع عمله، هي أصلا هتكون واحدة من المسافرين على الطيارة ومش هتدفعلها تمن التذكرة، لكن هيكون ليها أجر بالساعة مقابل رعايتها للطفل، والموقع بيتيح للسيدات المسافرين على نفس الطيارة كمان لو عندهم طولة بال وخبرة في رعاية الأطفال، إنهم يقوموا بالمهمة دي بمقابل.

صاحبة فكرة الموقع بتقول إنها فكرت تعمل ده بعد ما كانت بتعاني من السفر مع أولادها، خصوصا لما خلفت طفل تاني وبقت محتاجة حد يساعدها تشيل الشنط وياخد باله من الأطفال طول مدة الرحلة، وتحاول تأكلهم وتلاعبهم عشان ميعملوش دوشة، وطبعا ده كان صعب عليها جدا عشان كده فكرت تعمل موقع يوفق بين العائلات المسافرة والجليسات والمسافرين.

وعشان سلامة الأطفال، الموقع بيفحص الجليسات كويس وبيعملهم برنامج تدريبي قبل ما يبدأوا، عشان يتعلموا يتعاملوا مع الأطفال إزاي، والموقع بالفعل ابتدى يقدم خدماته على بعض الخطوط الجوية لكن لسه بيحاولوا يطوروا الخدمة ويوسعوها على خطوط أكتر.

 المصدر: مصراوي